Bjarni Karlsson er þrítugur tónlistarmaður frá Akureyri, menntaður píanisti og með B.A. gráðu í Skapandi tónlistarmiðlun. Hin ýmsu hljóðfæri eru honum þó kunnug, gítar, mandólín, langspil og fleiri. Þjóðlagatónlist hefur verið í forgrunni seinustu ár. Seinustu misseri hefur hann unnið að nýsmíði laga í íslenskum þjóðlagatónlistar-stíl, og munu þau heyrast í bland við gömul þjóðlög með örlitlum snúningi á.

Chris Foster - (söngvari, gítar- og langspilsleikari) hefur verið lýst sem einum af fremstu söngvurum og gítarleikurum á sviði enskrar þjóðlagatónlistar. Hið virta þjóðlagatímarit fRoots telur hann með þeim goðsögnum sem leiddu aðra bylgju vakningar þjóðlagatónlistar í Bretlandi á 7. áratugnum. Chris færði hin gömlu ensku þjóðlög til nútímans með frumlegum gítarútsetningum og söng. 

Síðastliðin 40 ár hefur Chris komið fram og tekið upp í Bretlandi, Evrópu og Norður-Ameríku. Síðasta plata hans ‘Hadelin’ frá árinu 2018 var tilnefnd til ensku BBC þjóðlagatónlistarverðlaunanna.  

Chris hefur verið búsettur á Íslandi síðan 2004 þar sem hann starfar, bæði sem sólólistamaður og sem partur af dúettinum Funa ásamt eiginkonu sinni Báru Grímsdóttur. Tónleikarnir í Fríkirkjunni eru fyrstu tónleikar Chris í fullri lengd síðan í heimsfaraldrinum.

Skoðaðu tónlist Chris á: https://chrisfoster1.bandcamp.com      www.chrisfoster-iceland.com